plak: Bernlef, Grins

datum: tongersdei 29 maart 2007

skriuwers: Hein Jaap Hilarides, Meindert Talma, Janneke Spoelstra, Henk Wolf, Arjan Hut,

Antine Zijlstra, Nyk de Vries

oanfang: 20.00

Bernlef en Fryske literatuer ha in lange histoarje. Dêrom nei in skoftke fan ôfwêzichheid

opnij tiid foar in literêre jûn. Ditkear mei in lichting nije Fryske skriuwers dêr't in diel fan har

woartels hat yn Bernlef sels. It sil sa'n tsien jier lyn wêze dat Meindert Talma en

Nyk de Vries harren kopiearde kultblêdsje De Blauwe Fedde presintearden yn 'e soas

(in jûn mei ûnder oaren ek Albertina Soepboer), mei daliks de oare wike in stik yn 'e

Ljouwerter Krante mei as boadskip dat men foar de jongste Fryske literêre dissidinten

toch foaral yn Grins wêze moast.

te finen wie yn Fryslân is foarby. Hjoeddei ferskynt der in stream fan boeken fan

jongere Fryske skriuwers en dichters en ôfgeand op 'e loovjende ûntfangst fan

bygelyks de twatalige bondel Droom in Blauwe Regenjas/Dream yn Blauwe Reinjas

sjocht men ek bûten Fryslân mei nocht ta. Dêrby komt dat skriuwers harren hieltyd

faker op it poadium manifestearje, mear as froeger, of yn alle gefallen mear struktureel.

It liket ûnderdiel fan in trend om as skriuwer net binnenhûs te bliuwen, mar mei it publyk

yn kontakt te kommen op wordslams of op de withoe folle literatuermaratons yn it lân.

Op de 29e maart sille yn Bernlef skriuwers har sjen litte dy't meidogge oan it projekt

Fryske Modernen, in gearwurkings-ferbân fan in oantal útjouwers om Frysk skriuwtalint

mei potinsje yn boekfoarm út te bringen. De earste roman yn 'e rige, Prospero fan Nyk de

Vries, is ôfrûne jier ferskynd en is posityf ûntfongen as eigentiids proaza, mei beide fuotten

steand yn 'e wrâld fan hjoeddei en skreaun yn in linich Frysk. It projekt is dêrmei op

gong en de twadde skriuwer Hein Jaap Hilarides hat syn manuskript klear en it boek sil

yn 'e rin fan dit jier ferskine. Beide skriuwers sille tongersdei 29 maart foarlêze, krekt as

Meindert Talma, Janneke Spoelstra, Henk Wolf, Arjan Hut en Antine Zijlstra. Oan 'e ein

is der in iepen poadium dêr't talint út Bernlef him oppenearje kin.

Koartsein: kom del, harkje ta en oardielje sels hoe't it stiet mei de fertelkeunst yn 'e Fryske

letteren.